Monthly Archives: ಏಪ್ರಿಲ್ 2010

‘ಸಮರಸ’ದಲ್ಲಿ ನನ್ನ ಬರಹ


ನನ್ನ ಕವನ ‘ನಿಸರ್ಗದ ಈ ಕೂಗು ನಮಗೆ ಕೇಳುವುದೆಂದು……..?!’
29/04/2010 ರಂದು ‘ಸಮರಸ‘ ಪತ್ರಿಕೆಯಲ್ಲಿ ಪ್ರಕಟಗೊಂಡಿದೆ.
ನನ್ನ ಕವಿತೆಯನ್ನು ತಮ್ಮ ವೆಬ್ ಪತ್ರಿಕೆಯಲ್ಲಿ ಪ್ರಕಟಿಸಿರುವುದಕ್ಕೆ ‘ಸಮರಸ’ದ ಗುರುಪ್ರಸಾದ್ ರಿಗೆ ನನ್ನ ಕೃತಜ್ಞತೆಗಳು.
ಓದಲು ಇಲ್ಲಿ ಕ್ಲಿಕ್ಕಿಸಿ.

— ರಾಘವೇಂದ್ರ ಹೆಗಡೆ

ಸ್ಪೂರ್ತಿ


ಕಾರ್ಮೋಡದ ತೆರೆಯೊಂದ ಮೆಲ್ಲನೆ ಪಕ್ಕಕೆ ಸರಿಸಿ

ಅದರ ಅಂಚಲೇ ತಂದೊಂದ ಹೊನ್ನಿನ ಗೆರೆಯನು ಬಳಿಸಿ

ಮಂದವಾಗಿಯೇ ಸನಿಹಕೆ ಬರುತ ಕತ್ತಲ ಹೊಗೆಯನು ಅಳಿಸಿ

ಮೆಲ್ಲಮೆಲ್ಲನೆ ಸ್ಪಷ್ಟವಾಗುತ ಬೆಳಕನು ಎಲ್ಲೆಡೆ ಹರಿಸಿ

ಬಂದ ಬಾನ್ಕಿರಣವೊಂದು ಸಕಲ ಬಾಳಿಗೆ ಸ್ಪೂರ್ತಿ

ಜಗದಿ ಪಸರಲು, ಹಬ್ಬುತ ಹರಿಯಲಿ ಎಲ್ಲೆಡೆ ಪ್ರೀತಿ.

ನಿಂತಲ್ಲಿಯೇ ನಿಲ್ಲದಂತೆ ಜುಳುಜುಳು ಗುಡುತ ಹರಿದು

ಹನಿಹನಿಯಲ್ಲೂ ಶಕ್ತಿಯ ತುಂಬಿ ಸಕಲಕೆ ಜೀವಧಾರೆಯನು ಎರೆದು

ಝರಿಝರಿಯಲ್ಲೂ  ತುಂತುರುಗುಡುತ ಬಾಳವೀಣೆಯನು ಮಿಟಿದು,

ಸರ್ವಜೀವಿಯ ಹೃದಯದಭಿದಮನಿಯಿಂದ ಅಪಧಮನಿಯವರೆಗೂ ಹರಿದು

ಜೀವ ನೀಡುವ ತಾಯಿ ಸಲಿಲೆಯೇ ಸರ್ವಕೆ ಸ್ಫೂರ್ತಿ

ಉರಿಯಲೂ ಪ್ರತಿಯ ಜೀವದ ಆತ್ಮ ಜ್ಯೋತಿ.

ದೂರದೂರದವರೆಗೆ ಚಿಕ್ಕದಾಗಿಯೇ ತನ್ನಯ ಕುರುಹನು ತೋರಿ

ನಂಬಿಕೆ ಉಳಿಸಿ, ಧೈರ್ಯವಬಿತ್ತಿ ನಸುನಗುತ ಯಶವನು ಕೋರಿ

ಮೆಲ್ಲನೆ ನಗುವನು ತುಟಿಯಂಚಲಿ ಅರಳುತ ಮೂಡಿಸಿ

ಜೀವಕೆ ಸ್ಪೂರ್ತಿಯ ತಂಪಿನ ಕಂಪನು ಸಿಂಚಿಸಿ

ಮುಸ್ಸಂಜೆಯಲಿ ಬಾಗಿಲ ಬಳಿ ಬೆಳಗುವ ಜ್ಯೋತಿಯೇ ಸ್ಫೂರ್ತಿ

ಬೆಳಗಲು, ಹಬ್ಬುತ ಅರಳಲಿ ಎಲ್ಲೆಡೆ ಪ್ರೀತಿ

ಮೊಳಗಲಿ ವಿಶ್ವಶಾಂತಿ.

(ಚಿತ್ರ ಕೃಪೆ: http://www.hickerphoto.com & http://www.photo.net)

— ರಾಘವೇಂದ್ರ ಹೆಗಡೆ.

ನಿಸರ್ಗದ ಈ ಕೂಗು ನಮಗೆ ಕೇಳುವುದೆಂದು……..?!


ನಿನ್ನ ಹೊರೆಯ ಭಾರ ಇಳಿಸುವ ಸನ್ನಾಹದಿ ನಾನು..
ಆದರೆ..? ನನ್ನನೇ ಜರೆಯುತ್ತ ನಿನ್ನ ತಲೆಗೇ ಅದರ
ಸುತ್ತಿಕೊಳ್ಳುವ ದುಸ್ಸಾಹಸದಿ ನೀನು…..!
ಹೇಳು ಅವಸಾನದ ಬಗ್ಗೆ ನಿನಗೇನು ಗೊತ್ತು.,
ನಾನಿರದಿರೆ ನೀನೂ ಇರಲಾರೆ ಒಂದು ಕ್ಷಣಿಕ ಹೊತ್ತೂ.!

ಮಾತು ಬಾರದು ಎನಗೆ ಎಂದು ಏನೂ ಅರಿಯಲಾರೆ ನಾನು
ಎಂದೆಲ್ಲ ಎಣಿಸಬೇಡ….
ಧೂಮ ಸೇದಿ ಬಿಡುತ, ಕುಡಿದು ಕಂಡಕಂಡಲ್ಲಿ ಬಾಟಲಿ ಬಿಸುಟಿ
ನನ್ನ ಕೆಡಿಸುತಿಹ ನಿನ್ನ ಚೆನ್ನಾಗಿ ನಾ ಬಲ್ಲೆ..
ಹೇಳಲಾಗದು ಎನಗೆ ಎಂದೂ ಅಭಿಪ್ರಾಯಿಸದಿರು,
ಕಾಲಕಾಲಕೆ ಕಾಲನೊಡೆ ಸೇರಿ ನಾನು ಮರುತ್ತರವ ನಿನಗೆ ಕೊಡುತಿಹೆ..

ನೋಡು ನೀನೊಬ್ಬನೇ ಅಲ್ಲ ನನ್ನ ಮಡಿಲಲಿ ಇರುವವ..
ವ್ಯಾಘ್ರ, ಸಿಂಹ,ಕಾಗೆ,ನವಿಲು, ಕೋಗಿಲೆ,ಗಂಧ, ಹೊನ್ನೆ,ಬೇವು, ಜಾಲಿ..
ಹೀಗೆ ಕೋಟ್ಯಂತರ ವಿಧದ ಜೀವಗಳಿವೆ..,
ಅವನ್ನೆಲ್ಲ ನಾನೇ ಸಾಕಬೇಕು.
ನನ್ನ ಅಳಲ ಅರ್ಥೈಸಿಕೊ,
ಸಿಕ್ಕಸಿಕ್ಕಲ್ಲಿ ಪ್ಲಾಸ್ಟಿಕ್ ನ ತೂರಬೇಡ,
ಕಂಡಕಂಡಲ್ಲಿ ನೀರು ಗಾಳಿಯ ಕೆಡಿಸಬೇಡ.
ಇರಲಿ ಒಂದಷ್ಟು ಪಾವಿತ್ರ್ಯತೆ ಅದಕ್ಕೆ….!

ನೀನಂತೂ ‘ಆಚಾರ’ ‘ಸಂಸ್ಕಾರ’ ಎಂಬ ಪದಗಳ ಅರ್ಥ ಮರೆತಿರಬಹುದು..
ಆದರೆ ನನಗೆ ಒಂದಷ್ಟು ಸಂಸ್ಕಾರವಿದೆ, ಆಚಾರವಿದೆ..
ನಿನಗೆ ಉತ್ತರ ಕೊಡಲು ಅದನ್ನೆಲ್ಲ ನಾ ಮರೆಯುವಂತೆ ಮಾಡಬೇಡ.!
ನೋಡು ಇದು ನಿನಗೆ ನನ್ನ ವಿನಂತಿ ಎಂದಿಟ್ಟುಕೊ,
ಹೀಗೆ ನನ್ನ ಮೇಲೆ ನೀ ಕಂಡಕಂಡದ್ದನ್ನು ಎರಚಿ ಹರಿಹಾಯ್ದರೆ
ನಿನ್ನ ಮೇಲಿನ ಅದರ ಪರಿಣಾಮವ ಅರಿಯುವೆ ನೀ ಶೀಘ್ರದಲ್ಲೇ..

ನನಗಂತೂ ಯಾರನ್ನೂ ನೋಯಿಸುವ ಇರಾದೆಯಿಲ್ಲ.
ಯಾಕೆಂದರೆ “ನಿನ್ನಂತಲ್ಲ ನಾನು…….!”
ಇಲ್ಲಿಯ ಸಕಲವ ಪೊರೆಯುವ ನನ್ನ ಜವಾಬ್ದಾರಿಯ
ಸಂಪೂರ್ಣವಾಗಿ ನಾ ಬಲ್ಲೆ,
ಸುಮ್ಮನೆ ಕೆಣಕಿ ನನ್ನ ತಾಳ್ಮೆ ಪರೀಕ್ಷಿಸದಿರು.
ಮಗುವಂತೆ ನನ್ನ ಮಡಿಲಲ್ಲಿಟ್ಟು ನಿನ್ನ ಸಲಹುವೆ..

ನೋಡು, ಆದರೂ ಕಡೆಯ ಮಾತೊಂದ ಕೇಳು..
ನನ್ನ ಇಷ್ಟೂ ಮಾತುಗಳಿಗೆ ನೀ ಕಿವಿಗೊಡದಿರೂ
‘ಅರಿಯದ ಮಗು’ ಎಂದು ನೀನಿರುವಷ್ಟು ದಿನ ನಿನ್ನ ಸಾಕುವೆ.
ಆ ಬಗ್ಗೆ ಏನೂ ಚಿಂತಿಸದಿರು….!
ಯಾಕೆಂದರೆ ಮೊದಲೇ ಹೇಳಿರುವೆನಲ್ಲ “ನಿನ್ನಂತಲ್ಲ ನಾನು…..!”

*****
ನಿಸರ್ಗದ ಮೌನ ಪ್ರತಿಕ್ರಿಯೆಗೆ ಶಬ್ದ ಬೆಸೆವ ಒಂದು ಪುಟ್ಟ ಪ್ರಯತ್ನ ಈ ಕಳಕಳಿ.
–ರಾಘವೇಂದ್ರ ಹೆಗಡೆ
*****

ವಸಂತದ ಮುಸ್ಸಂಜೆಯೊಂದು ಪದಗೊಂಚಲೊಳು ಸಿಲುಕಿದಾಗ


ಮರಿಹಕ್ಕಿ: ಹಾಡಿನಿಂದ ಗೂಡಿನೆಡೆಗೆ 
             ಭಾವವಿಹಾರ ಮುಗಿಸಿ ಬಂಧದೆಡೆಗೆ 
             ಗರಿಯ ಮಡಚಿ ತಾಯ ತೋಳಿನೆಡೆಗೆ.

vasantada ondu mussanje
(ಚಿತ್ರಕೃಪೆ:http://www.murweh.qld.gov.au/attractions/)

ಹೂವು: ಕಡಲಿಗಿಳಿದ ರವಿಯನೋಡಿ 
          ನಾಚಿ ತಾನೂ ತಲೆಯಬಾಗಿ 
          ಗಿಡದ ಜತನ ಬಂಧದಿಂದ ಮುಕ್ತವಾಗಿ.. 


ದುಂಬಿ: ಈಗಲೇ ಬೆಳಗಾಗಬೇಕು.
        ಹೂವು ಗಂಧವ ಸೂಸಬೇಕು..
        ನಾ ಮಕರಂಧವ ಹೀರಬೇಕು..

 
ಜಿಗುಪ್ಸಿತ: ಬಂದೇಬಿಟ್ಟಿತಲ್ಲ ಮತ್ತೊಂದು ಮುಸ್ಸಂಜೆ..
          ಇನ್ನೆಷ್ಟೋ ನನ್ನ ಬಾಳಲಿ ಈ ತರಹ ಸಂಜೆ..!


ಕಿರಾಣಿ ವ್ಯಾಪಾರಿ: ಹೇಗೂ ಮುಸ್ಸಂಜೆ,
               ಜನವೂ ಜಾಸ್ತಿ..,
               ಇನ್ನೇನು ನಾನು ಮಾಡಿದ್ದೇ ತೂಕ..!


ಪಡುವಣ ತೀರ: ಹೊನ್ನರಾಶಿಯಂತೆ ಹೊಳೆವ ಮರಳ ರಾಶಿ
                    ಬೆಳ್ಳಿಯ ಅಲೆಗಳಿಗೆ ಚಿನ್ನದ ಲೇಪ...!


ರಸ್ತೆ: ಕೊನೆಯಿಲ್ಲದ ನಡಿಗೆಗೆ ಕೊಂಡಿ,
      ದಾರಿಹೊಕನಮನೆಗೆ ರಾಜಮಾರ್ಗ..
      ಕುಡಿದ ಅಮಲಿನಲ್ಲಿ ತೂರಾಡುತ್ತಿರುವವಗೆ
          - ಕಾಲು ಚಾಚಿದಷ್ಟೂ ಮುಗಿಯದ ಹಾಸಿಗೆ....!

ಕವಿತೆ: ಒಲವು ಜೊತೆಗಿರಲು ಯುಗಳಗೀತೆ..
      ಎದೆಯು ತುಂಬಿಬರಲು ಭಾವಗೀತೆ..    
      ಏಕಾಂತದ ಏಕತಾನತೆಯಲ್ಲಿ ಮೌನಶಬ್ಧ .,
      ಮನದ ವ್ಯಥೆಯ ಗೊಂಚಲೊಳಗಿನ ಸ್ಥಿತಿಯ ಅಭಿವ್ಯಕ್ತತೆಯಲಿ ಒಂದು ನೋವಕಥೆ....!

                       ****
ಹನಿಹರವು, ಒಂಚೂರು, ನಾಲ್ಕೇಸಾಲು ವಿಭಾಗಗಳಲ್ಲಿ ಕವಿತೆಗಳನ್ನು 
ಬರೆಯುತ್ತಿದ್ದ  ನನ್ನ ಮತ್ತೊಂದು ಪ್ರಯತ್ನ ಈ ಪದಗೊಂಚಲು. 
ಇದು ಕವಿತೆಯ ಹಾಗೆ, ಕಥೆಯ ಹಾಗೆ, 
ಒಂದು ಸಮಯದಿ ಸಂಭವಿಸಬಹುದಾದ ವಿಭಿನ್ನತೆಯ 
ಒಂದು ಶಬ್ದದೊಡೆ ಪೂಣಿಸಲು ನನ್ನದೊಂದು ಪ್ರಯತ್ನ.
ನಿಮ್ಮ ಪ್ರತಿಕ್ರಿಯೆಗೆ ಸದಾ ಸ್ವಾಗತ.
 
                       -- ರಾಘವೇಂದ್ರ ಹೆಗಡೆ 
                                             ****