Monthly Archives: ಫೆಬ್ರವರಿ 2011

ನನ್ನ ಸುತ್ತಲ ಬೇಲಿ


ಹತ್ತಿರದ ಹಾದಿಯೆಂದು ರಸ್ತೆಗೆ
ಕಾಲಿಡುತ್ತಿದ್ದಾಗ ಅಂಗಿ ಕಾಲರಿಗೆ ಸಿಕ್ಕಿ
ನೂಲು ಎಳೆದ ಬೇಲಿಕೊಲು

ಅರೆ, ಆ ದಿನ ಎಲ್ಲ ಬಟ್ಟೆಗಳನ್ನು
ನೇತುಹಾಕಿ ಒಣಗಿಸಿದ್ದು ಇದರಲ್ಲೇ ಅಲ್ಲವೇ..?
ಕೊಳೆಗೆ ಮುಕ್ತಿಕೊಡಲು ನೀರಿಗಿಳಿದು
ಬಂದ ಬಟ್ಟೆಗೆ ಬಿಸಿಲ ಹಾಸ ಹೊದೆಸಿ
ಆಶ್ರಯಿಸಿದ್ದ ಇದೇ ಈಗ ಅಂಗಿ ಎಳೆದು
ನನ್ನ ಬಂಧಿಯಾಗಿಸುತಿದೆ..,

ಎಷ್ಟಾದರೂ ನಾನೇ ಹೇಳಿ ನಿರ್ಮಿಸಿಕೊಂಡ
ಆವರಣ ನನ್ನ ಕಟ್ಟಿಹಾಕಿದರೆ
ಅದ ದೂರುವುದದೆಂತು..?!

ಎರಡು ದೋಣಿಮೇಲೆ ಕಾಲಿಟ್ಟಂತೆ
ಆಚೆಗೊಂದು ಈಚೆಗೊಂದು ಕಾಲಿಟ್ಟ
ಅನುಭವ ಈಗ ನನಗೆ..
ಒಂದುರೀತಿ ನಿರ್ವಾತದಲಿ
ಉಸಿರಾಡುವ ಹಾಗೆ. ಹಗಲು-
ಇರುಳು ಕಣ್ಣಿಗೆ ನೆಸೆನೆಸೆದು ಉರುಳುತಿವೆ;

ಇಬ್ಬಂದಿ ಬಗೆಯ ಹೊಯ್ದಾಟದಲಿ
ನಾಕಾಬಂಧಿಯಾಗಿ ನನಗೆ ನಾನೇ
ಮೂರನೆಯವನಾಗುತ್ತಿದ್ದೇನೆ..
ಹೇಗಾದರೂ ಮಾಡಿ ಇದರಿಂದ ಪಾರಾಗಲು
ಮುಂದುಗಡೆ ಹೋಗಬೇಕೆನ್ನುವಷ್ಟರಲ್ಲಿ
ನೆನಪಾಗುತದೆ ಇದು ಹಿತ್ತಲ ಬೇಲಿಯಲ್ಲ;
– ಸುತ್ತಲ ಬೇಲಿ..!

— ರಾಘವೇಂದ್ರ ಹೆಗಡೆ

Advertisements

ಬರುಕಿಹನು ಕಾಲದೂರಿಗೆ ಶಿಶಿರ


ಶಿರಬಾಗಿ ಮುದುಡಿರುವ ಮೊಗ್ಗು
ಕಾಯುತ ಭಾನರಶ್ಮಿಯ ಸ್ಪರ್ಶಕೆ
ಅದರೊಳಗೆ ಅವಿತಿರುವ ಹನಿಯು
ತವಕಿಸುತಲಿ ಇಳೆಮುತ್ತಿ ಮುಕ್ತಿಗೆ
ದನಿಯಾಗಿ ಸಣ್ಣನೆಯ ಚಳಿಗಾಳಿಗೆ
ಸಾರುತಿದೆ ಶಿಶಿರನಾಗಮವ ಕಾಲದೂರಿಗೆ

ಒಣಗಿದೆಲೆಗಳ ಉದುರಿಸಿ,
ನಿಂತಿರುವಲಿ ಬೆಚ್ಚನೆಯ
ಆಸರೆಯ ಸಂಕಲ್ಪಿಸಿ ಮರ,
ಹಂಚುತ ತನ್ನ ತರಗೆಲೆಯ ಗೊಬ್ಬರ
ಆಮಂತ್ರಿಸುವುದು ಧರೆ
ಮೈಮುದುಡಿ ಬರುವಂತೆಯೆ ಶಿಶಿರ.

ರವಿಯ ಇಷಾರೆಯೊಂದು
ತಾಕಿ ಉದುರಲು ತುಷಾರಬಿಂದು
ಸುತ್ತೆಲ್ಲ ಕೊರೆವ ಚಳಿ ಇಳಿಯೆ
ಗೂಡಿಂದ ಹೊರಗಿಣುಕಿ ಹಕ್ಕಿ ಮೈಗೊಡವಲು
ಮರಿದುಂಬಿ ಹೂವೆಡೆಗೆ ಗುಂಯ್ ಗುಡುತ ನುಲಿಯೆ
ಮೈಮರೆತು ಮನದುಂಬಿ ಬರುತಿಹನು ಶಿಶಿರ..

— ರಾಘವೇಂದ್ರ ಹೆಗಡೆ