ಬ್ಲಾಗ್ ಸಂಗ್ರಹಗಳು

ಎದೆಯ ಪದ ಹಾಯುವಲ್ಲಿ …


ಹಸಿರೆಲೆಯು ಚಿಗುರುತಿದೆ
ಮತ್ತೆ ಚೈತ್ರದ ಬೆಳಕು
ನಿಂತ ನಿಲುನೆಲವು ನವ್ಯ
ಹೊಸತಾಗಿ ಹರಿಯುತಿದೆ
ಹಳೆಯ ಮಂದಾಕಿನಿಯು
ನಿನ್ನೆದೆಗಡಲದರ ಗಮ್ಯ.

ಮರಳ ತೀರದಿ ಶಬ್ದ
ಸ್ಥಬ್ದವಾದಷ್ಟೇ ಹೊತ್ತು
ಮೌನದಲಿ ಉಸಿರೆಲ್ಲ ದನಿಯುಸುರಿದ್ದು
ದೀಪಸಾಲಿನ ಸ್ಥಂಭ
ಬೆಳಗಲಣಿಯಾದಷ್ಟೇ ಹೊತ್ತು
ಹೆಗಲಿನಲಿ ಜಗದ ಅಲೆ ನಗುವತೇಲಿದ್ದು

ಹಾದಿಹಾದಿಗಳಿಗೆಲ್ಲ
ನಕ್ಷತ್ರ ಕಾವಲುಂಟು
ರಿಂಗಣಿಸುವುದದೇಕೆ
ಮತ್ತೆ ಮೌನ!
ರಿಂಗಣಿಸದಿರದೇಕೆ
ಮತ್ತೆ ಮೌನ!?

ಹಗಲುಗಣ್ಣಲಿ ಇನ್ನೊಂದಿಷ್ಟಿರುಳು
ಕಳೆದೇ ಹೋಗಲಿ
ಹರಿದಾದರೂ ನಿನ್ನ ನಾ ತಲುಪುವೆನು;
ಚಕ್ರ ಕಟ್ಟಾಗಿದೆ
ರೆಕ್ಕೆ ಬಿಚ್ಚುವುದೊಂದೇ ಬಾಕಿ
ಈಗಾದರೂ ನಾ ಮುಂದೆ ಹಾಯಬೇಕು
ಇಲ್ಲವಾದರೆ ಮತ್ತೆ ಕಾಯಬೇಕು?

ಹಸಿರೆಲೆಯು ಚಿಗುರುತಿದೆ
ಮತ್ತೆ ಚೈತ್ರದ ಬೆಳಕು…

— ರಾಘವೇಂದ್ರ ಹೆಗಡೆ

***

ಸರ್ವರಿಗೂ ‘ವಿಜಯ’ಸಂವತ್ಸರ ಸನ್ಮಂಗಲವನ್ನುಂಟುಮಾಡಲಿ.
ರಾ ಗ ನೌ ಕೆ‘ಯ ಓದುಗರಿಗೆಲ್ಲ ಯುಗಾದಿ ಹಬ್ಬದ ಹಾರ್ದಿಕ ಶುಭಾಶಯಗಳು 🙂
|| ಹರೇ ರಾಮ ||

— ರಾಘವೇಂದ್ರ ಹೆಗಡೆ

***

Advertisements

ಕನ್ನಡಿ ರೆಕ್ಕೆ


ಯಾರೋ ಹಚ್ಚಿ ಹೋದ ಕಿಡಿಗೆ
ಸುಟ್ಟ ಮಣ್ಣ ಬದಿಬದಿಯೆಲ್ಲ
ಹಾದಿಯೆಂದು ಹೊರಟು
ನಿಟ್ಟುಸಿರಿಟ್ಟು ಕೊಂಚ
ದೂರದಿ ಕಾಯುತಿದೆ ಹಣತೆ
ಆಹ್ವಾನಿಸುತ ಎಂಬಂತೆ
ಆವಾಹನೆಯಾದ ಸ್ಥರಗಳಿಗೆಲ್ಲ
ಭರತ ಇಳಿತಗಳು
ಇಲ್ಲಿ
ಉಸಿರಾಟದ ಪರಿಕರಗಳು.

ಕಂಡದ್ದು ಹಣತೆಯಲ್ಲ
ಹಣತೆಯೆಂಬ ಭ್ರಮೆ
ತೆರೆಗಳ ನಡುವೆ ಬಿದ್ದು
ಹಿಂದೆ ಮುಂದೆ ಹೊಯ್ದಾಡುವ
ಕವಿತೆಯ ಶಮೆ
ಕತ್ತುರಿದು ಬಿದ್ದ ಕಿಡಿ
ಊರಲ್ಲ
ಹಾನತೆಗೆದೆಳೆಯಲು ತೇರಿಲ್ಲ

ಅಗ್ರವಾಗಿ ಕಂಡದ್ದೆಲ್ಲ ಉಗ್ರವಾಗಿ
ಮರಳಿಗಿಳಿಯಲು ಅಡ್ಡಡ್ಡ ಸೀಳಿ
ಕಾಲ್ತಡೆಸುತ್ತ ವ್ಯಘ್ರವಾಗಿ
ಮಿಸುಕಾಡುವ ನಡಿಗೆ
ಧರೆಗೂ
ತುಸುತಾಪ ಅಡಿಗೆ.

ಜಾರಿಸರಿದವುಗಳು ಹಲವು
ಹಾರಿದವು ಮರೆತು ದೂರ
ಅರೆಮಬ್ಬಿನಲಿ ಮುರಿದ
ರೆಕ್ಕೆಯ ಬಳಚುತ್ತ
ಹಾರಲೆತ್ನಿಸಿದ್ದು ಬರಿ ಕವಿತೆಯಲ್ಲ
ಕೊಳದ ತಿಳಿನೀರಲ್ಲಿ ಕಾಣುವ
ಕಟುವಾಸ್ತವ
ಅದಕ್ಕೆ ನೋವಿದೆ
ಅಲ್ಲಲ್ಲ ತುಸು ನೆಮ್ಮದಿಯಿದೆ
ಮೋಡ ನೀನಳಬೇಡ
ಮುರಿಯದಿರಲಿ ಮತ್ತೊಂದು ರೆಕ್ಕೆ

******

— ರಾಘವೇಂದ್ರ ಹೆಗಡೆ

******

... ಶುಭಾಶಯ...

ಕೊ: ತಮ್ಮೆಲ್ಲರಿಗೂ ದೀಪಾವಳಿ ಹಬ್ಬದ ಹಾರ್ದಿಕ ಶುಭಾಶಯಗಳು.. 🙂

******

[image source: picassaweb]

******

ಇತ್ತೀಚಿನ ದಿನಗಳು..!


ಹೊಸ ಡಾಂಬರು ಬಿದ್ದು ಸಪಾಟು ಮಲಗಿದ ರಸ್ತೆಗೆ ಮಣ್ಣಬಿರುಕು
ಬಿದ್ದ ಗಾಯಕೆ ಒದ್ದೆನೋಟದ ಅಣಕು
ಸ್ತಬ್ಧತೀರದ ಬಿಸಿಮರಳ ಮೇಲ್ನೆಟ್ಟ ಸೂರು
ಅರೆ ಝೂಮುಲೆನ್ಸಿನ ಮೇಲೆ ಬೆರಳಿಟ್ಟದ್ದು ಯಾರು.?

ನಾಲ್ಕುಮಳೆಹನಿಯ ಉಡಾಯಿಸುವಂತೆ ಬಂದ ಮೋಡ
ನಾಡಿಹಿಡಿಯುತ ಅದರ ಬಿಂದಾಸ್ ಹಾರಿಸುವ ಗಾಳಿ
ಅವರಿಗೇನೋ ಇಂದು ಒಪ್ಪತ್ತಂತೆ
ಅಡಿಗೆ ಮಾಡಿಗೆ ಹಚ್ಚಲು ರಾಶಿಬಿದ್ದದ್ದು ಪೂರ ಮಡಲುಗರಿಕಂತೆ

ಮೊನ್ನೆಯಷ್ಟೆ ಬಸ್ ನಲ್ಲಿ ಸಿಕ್ಕಿದ್ದೇನೆಂದವನೊಬ್ಬ ಈಗ ನಕ್ಕಿದ್ದಾನೆ
ಊರೂರು ತಿರುಗಿಬಂದವ ಅಂಗಳದಲಿ ಬಿಕ್ಕ ನಿತ್ಯಪುಷ್ಪಗಳ ನಡುವೆ ನಿಂತಿದ್ದಾನೆ
ದಾರಿ ದಣಪೆಯವರೆಗೇನೋ ಸರಿ
ಅದರಾಚೆಯ ಪರಿಸ್ಥಿತಿಯ ಈಗ ದಾಟೇ ನೋಡಬೇಕು..

ಶುದ್ದಬಿಸಿಲಿನ ಕುಡಿಗೆ ಕಾವು ಕೊಟ್ಟದ್ದು ಯಾರು
ತಂಪು ಗಾಳಿಯ ಕಸಿದು ಬೆವರ ಬಸಿಸಿದ್ದು ಯಾರು
ಮುನ್ನುಡಿಯ ಬೆನ್ನುಚುಚ್ಚುವ ಪ್ರಶ್ನೆಗಳ ಸುತ್ತು
ನೆತ್ತಿಮೇಲೆ ಸುಟ್ಟಿದ್ದು ಬಿಸಿಲೋ ಹೊಳೆಯೋ ಯಾರಿಗ್ಗೊತ್ತು.!?

ನಾನೂ ಮೌನವಾಗೇ ನೋಡುತ್ತಿದ್ದೆ ಏoಗಲ್ಲು ಬದಲಿಸುತ್ತಿದ್ದ ನೆರಳ
ನಾಲ್ಕುಪಥದ ರಹದಾರಿಯಲ್ಲಿ ಹೊರಟಮನಕೆ ಹಿಡಿಯಲಾಗಲಿಲ್ಲ ತೊರೆಯಮೇಲಿಟ್ಟ ಬೆರಳ
ಅರ್ಜಂಟು ಬರುವಾಗ ತರಲು ಮರೆತ ಕ್ಯಾಮರಾ ಈಗ್ಯಾಕೆ ಬೇಕು..
ಅಂದು ಇಂದು ನಿನ್ನೆ ನಾಳೆಗಳ ಸಂತೆಯಲಿ ಬಾಕಿಚಿಂತೆಗಳ ಹೋಲ್ ಸೇಲ್ ಮಾರಿಬಿಡಬೇಕು

ಇಷ್ಟೆಲ್ಲ ಕಾದು ನಿರೀಕ್ಷಿಸಿದ್ದು ಹೌದಾದರೂ ಬಯಸಿದ್ದ ಮಳೆ ಅಚಾನಕವಾಗಿ ಬಿದ್ದಿದ್ದೇ ಹೆಚ್ಚು
ಹೂವು ಅರಳುವುದೇಇಲ್ಲ; ರೆಕ್ಕೆ ಬಲಿಯುವುದೇ ಇಲ್ಲ ಹಾಗೆ ಚಂದನೋಡುವ ಅಂದುಕೊಂಡವರಿಗೆಲ್ಲ
-ಈಗ ಪೆಚ್ಚುಪೆಚ್ಚು!
ಗೋಡೆಯ ಕಡೆ ಎರಗಿ ನೋಡಿದ್ದೇನೋ ಹೌದು ಆದರೆ ಈಗೆಷ್ಟು ಹೊತ್ತು..?
ಚಲಿಸುವ ಮುಳ್ಳುಗಳ ಮುನ್ನೆಲೆಯ ಗಾಜಪರದೆಯಲಿ ಅರ್ಧಮುಖ ಕಂಡದ್ದಷ್ಟೇ ಗೊತ್ತು..

— ರಾಘವೇಂದ್ರ ಹೆಗಡೆ.